கற்கை நன்றே கற்கை நன்றே

கற்கை நன்றே கற்கை நன்றே

என் கல்லூரி தோழி ஒருவர் வெளியூரில் இருக்கிறார் அவர் ஒரு நாள் காலை எனக்கு போன் செய்து என் பையனுக்கு பள்ளியில் கல்வி பற்றி கவிதை கேட்டுள்ளார்கள் இன்னைக்கே வேண்டும் நீ எழுதி கொடு என்றார். கவிதை எழுதுவதில் நான் பெரிய ஆள் இல்லை உடனே எப்படிப்பா என்றேன் . என் பையன் கிட்டே நீ நல்லா கவிதை எழுதுவேன்னு சொல்லிட்டேன் எனக்கு எழுதி கொடு என்றார்.சரி என்று சொல்லிவிட்டு இரவு வீடு வந்தவுடன் அமர்ந்து எழுதி அவரிடம் நான் போனிலேயே சொல்ல சொல்ல அவர் எழுதி கொண்டார். அவரும் அவர் பையனும் நல்லாருக்கு என்று சொன்னார்கள்
இந்த கவிதை எப்படியிருக்கு என்று நீங்கள் சொல்லுங்களேன்

கற்கை நன்றே கற்கை நன்றே

பிச்சை புகினும் கற்கை நன்றே

இது சான்றோர் மொழி

கற்கை நன்றே கற்கை நன்றே

மரிக்கும் தருவாயினும் கற்கை நன்றே

இது எம் மொழி

கல்வியை ஐந்திலும் படிக்கலாம்

ஐம்பதிலும் படிக்கலாம்

வாழ்க்கையில் உயர

இதுவே படிக்கற்கலாம்

மனிதா நீ சேர்த்த செல்வத்தை செலவிடு

கற்ற கல்வியை அனைவர்க்கும் சொல்லி கொடு

இப்போது அளவிடு

செல்வம் காணாது போயிருக்கும்

கல்வியறிவோ குறையாது நிறைந்திருக்கும்

கல்லாதவன் கண்ணிருந்தும் குருடனாகிறான்

கற்றவன் குருடனாயினும் ஆயிரம் கண்ணுடையவனாகிறான்

கல்லாத செல்வந்தனுக்கும் தேவை ஒரு கற்றவன்

கற்ற ஏழைக்கு தேவையில்லை மற்றவன்

கற்றது கையளவு

கல்லாதது உலகளவு

ஆம்

கற்றோம்

கற்போம்

கற்பிப்போம்

இதையே நம் வேத வாக்காய் ஏற்போம்

இன்று ராமலிங்க அடிகள் வள்ளலார் அவர்கள் பிறந்த நாள் நான் நான்காம் வகுப்பு முதல் ஏழாம் வகுப்பு வரை நான்கு வருடங்கள் கும்பகோணம் வள்ளலார் மேனிலை பள்ளியில் படித்தேன்.

இன்று அவரது இந்த பிறந்த நாளில் கல்வி பற்றிய இடுகை வெளியிடுவதில் நான் மகிழ்ச்சியடைகிறேன்

ஆர்.வி.சரவணன்

எந்திர ஜாலம்

எந்திர ஜாலம்

எல்லோரும் எழுதியாச்சு நீ என்னத்தை எழுதிட போறேன்னு தானே கேட்கறீங்க

இல்லை சொல்ல வந்ததை சொல்லலேன்னா தலை வெடிச்சுடும் எனக்கு

எந்திரன் படத்தை இன்று காலை என் நண்பர்களுடன் 8 மணி ஷோ பார்த்தேன் சத்யம் எஸ்கேப் தியேட்டரில்

வைரமுத்து புதிய மனிதா பாடலில் எழுதியுள்ளது போல்

கருவில் பிறந்தால் மரிக்கும் அறிவில் பிறந்தால் மரிப்பதே இல்லை

என்பது போல் இயக்குனர் சங்கரின் இந்த படைப்புக்கு அழிவில்லை எனலாம்

சங்கரின் இந்த கனவு உழைப்பு படம் முழுக்க விரவியிருக்கிறது

ஷங்கரின் கனவு வெற்றி கண்டிருக்கிறது ரஜினி யின் துணையோடு

அதே போல் சூப்பர் ஸ்டார் ரஜினி இந்த வயதிலும் இப்படி யா என்று கை தட்ட வைக்கிறார் scientist ரஜினி அமைதியின் வடிவம் என்றால் சிட்டி ரஜினி தென்றலாய் மனதில் நுழைகிறார் எங்கும் நிறைகிறார். வில்லன் ரஜினி புயல் இல்லை இல்லை சுனாமி யாய் சுழன்றடிக்கிறார்

அதே அரிமா பாடலில் வரும் வரிகள் ரஜினிக்கு பொருத்தம் என்றால் அது மிகையில்லை

இவன் பேர் சொன்னதும் பெருமை சொன்னதும் கடலும் கடலும் கை தட்டும்

இவன் உலகம் தாண்டிய உயரம்தனை நிலவும் நிலவும் தலை முட்டும்

அடுத்து ஐஸ்வர்யா ராய்

இப்பவும் இன்னிக்கு பூத்த ரோஜா போல இருக்கிற இவங்களை பத்தி எழுதறது ஐஸுக்கு ஐஸை வைத்த கதையாகி விடும் இந்த படத்துக்கு அந்த கேரக்டர்க்கு அவங்க தான் பொருத்தம்

இசை ரகுமான் பாடல்களில் பின்னியிருந்தார் என்றால் பின்னணி இசையில் பட்டையை கிளப்பியிருக்கார் அவருக்கு என் சார்பாக ஒரு ஸ்பெஷல் பொக்கே

ஒளிப்பதிவாளர் ரத்னவேலு பெயருக்கேற்றார் போல் ஒவ்வொரு ஷாட் டையும் ரத்னமாய் ஜொலிக்க வைத்திருக்கார்

அதே போல் வசனங்கள் என்னை மிகவும் கவர்ந்திருக்கிறது சுஜாதா சுஜாதா தான்

காதல் அணுக்கள் கிளிமஞ்சாரோ அரிமா பாடல்கள் அசத்தலா இருக்கு

என்னடா இவன் நிறையை பத்தி மட்டும் சொல்றான் குறை பத்தி ஒன்னும் சொல்லமாட்டேன்குறான் அப்படின்னு தானே நினைகிறீங்க

சின்ன சின்ன குறைகளே தெரியாத அளவுக்கு

கிளைமாக்ஸ் மிரட்டல் விட்டிருக்கு

பிரமிப்பின் உச்சம் அது

படம் பார்க்கிறப்ப அதை உணர்வீங்க

குடும்பத்தோடு போய் பார்க்கமே விட்டுட்டோம்னு ரொம்ப பீல் பண்ணேன்

(அடுத்த வாரம் போறோம்லே )

நீங்களும் போய் பார்த்துட்டு வாங்க குடும்பத்தோடு

முடிவா சொல்லனும்னா ஏற்கனவே நான் எந்திரன் பற்றிய இடுகையில் குறிப்பிட்டிருந்தது போல் ஒவ்வொரு துறையிலும் உச்சம் தொட்ட சாதனையாளர்கள் இனைந்து உருவாகும் எந்திரன் இந்திய திரையுலகின் உச்சம் தொட வாழ்த்துகிறேன் என்று குறிப்பிட்டிருந்தேன்

உச்சம் தொட்டிருக்கிறது

எந்திரன் குழுவினருக்கு எனது வாழ்த்துக்கள்

ஆர்.வி .சரவணன்

அவசரமா எழுதியிருக்கேன் முதல் முறையா விமர்சனம் (சரி அனுபவம் )எழுதியிருக்கேன் ஏதேனும் குறையிருந்தால் பொறுத்துக்குங்கோ

புது பைக் வேண்டும்

புது பைக் வேண்டும்

உமா பிறந்த வீட்டுக்கு வருகிறாள் என்றாலே எல்லோருக்கும் உதறல் எடுக்கும் இன்று அவள் வருகிறேன் என்று போன் செய்தவுடன் அப்பா, அம்மா, அக்கா, தங்கை அனைவரும் என்ன புது பிரச்னையுடன் வருகிறாள் என்று தெரியாமல் மனசுக்குள் குமைந்தார்கள் என்ன பிரச்னையுடன் வருகிறாள் என்று தெரியவில்லையே என்று யோசித்து கொண்டிருக்கும் போதே வந்து விட்டாள்

வந்தவுடன் டூ வீலர் வாங்கி தர சொல்லி மாமியார் பிடுங்குவதாக புலம்ப ஆரம்பித்தாள்

அம்மா, "இன்னொரு பொண்ணு கல்யாணத்திற்கு இருக்கு அதுக்கு செலவு பண்ணனும் உன் அக்கா வீட்டுக்காரர்இருக்கார் மூத்த மாப்பிள்ளை.அவருக்கே வாங்கி தராத போது உன் புருசனுக்கு மட்டும் எப்படிம்மா வாங்கி தர முடியும்"

"இதை நான் சொல்லாமே இருப்பேனா சொல்லியாச்சு அதுக்கு எங்க மாமியார் சொல்றாங்க அவங்களுக்கு கேட்க துப்பில்லை அதுக்காக நாங்க கேட்காமே இருக்க முடியுமா னு சொல்றாங்க"

" கல்யாணம் பேசறப்ப இதெல்லாம் பேசவே இல்லையே உமா

பின்ன எப்படி அவங்க கேட்கலாம் " இது அப்பா

" அப்பா நீங்க இங்க உட்கார்ந்து கிட்டு ஆயிரம் பேசலாம் அங்க நான் படற அவஸ்தை எனக்கு தான் தெரியும்"

"இன்னொரு பொண்ணு கல்யாணத்திற்கு நிக்குதம்மா "இது அக்கா

"என்னோட கல்யாண வாழ்க்கையே நின்னு போயிடும் போல இருக்குக்கா"

"மாப்பிள்ளை என்ன சொல்றார்."இது அப்பா

"என் பிரெண்ட் அத்தனை பேருக்கும் வண்டி வாங்கி கொடுத்திருக்காங்க அவங்கவங்க மாமனார் வீட்டில் நான் மட்டும் தான் சைக்கிள் லே போறேன் எனக்கு அசிங்கமா இருக்கு ஒரு பைக் வாங்கி தர கூட உங்க வீட்டுக்கு யோக்கியதை இல்லியா னு கேட்கறார்."

"முடிவா என்ன தான் மா சொல்லியிருக்கே"

"வந்தா வண்டியோட வரேன் இல்லேன்னா என்னை தலைமுளுகிடுங்க னு சொல்லிட்டு வந்திருக்கேன்"

"அவங்க சொல்லலேன்னாலும் நீயே அவங்களுக்கு எடுத்து கொடுப்பே போலிருக்கு " இது தங்கை

"சும்மாருடி அவமானப்பட்டு வந்திருக்கிறது எனக்கு தான் தெரியும் உனக்கென்ன"

வேறு வழி இல்லாமல் உமாவின் அப்பா மாப்பிளையை கடைக்கு வர சொல்லி அவருக்கு பிடித்த பைக்கை பணம் செலுத்தி வாங்கி கொடுத்தார்.

உமாவின் புகுந்த வீட்டில் எல்லோருக்கும் வாயெல்லாம் பல்

"பரவாயில்லை இப்பவாவது வாங்கி கொடுக்குனும்னு மனசு வந்துதே உங்கப்பாவுக்கு "என்றார் மாமியார் பெருமூச்சுடன்

"கூடவே புது வண்டி வந்திருக்கு ரெண்டு பெரும் கோயிலுக்கு போயிட்டு வாங்க" என்று சொன்னார் மாமனார்.

உமாவின் கணவன் சந்தோசமாய் " வா உமா போயிட்டு வரலாம்" என்றான்.

"உமா நான் வரலைங்க நீங்க போயிட்டு வாங்க"

"ஏன் அப்படி சொல்றே"

"எங்க அப்பா கஷ்டப்பட்டு உழைச்ச காசுலே வந்த இந்த பைக்கை நான் அவரை படாதபாடு படுத்தி வாங்கிட்டு வந்திருக்கேன் நீங்க தானே ஆசைபட்டீங்க நீங்களே போயிட்டு வாங்க நான் ஆசைப்படலே

"உங்களுக்கு மாமனார் வாங்கி

கொடுத்த வண்டிலே போறது தான் கௌரவம்"

ஆனா எனக்கு நீங்க கஷ்டப்பட்டு சம்பாதிச்ச காசுலே வாங்கின இந்த சைக்கிள் லே போறது தான் கௌரவம் "

என்று சொல்லிவிட்டு தலை நிமிர்ந்து வீட்டினுள் செல்லும் அவளை பார்த்து அவர்கள் தலை குனிந்தனர்.

ஆர்.வி.சரவணன்

பனி விழும் இரவு

பனி விழும் இரவு

மனம் கவர்ந்த பாடல்கள் 3

மௌன ராகம் படத்தில் இடம் பெற்ற பனி விழும் இரவு ...............

இந்த படத்தில் இடம் பெற்ற அனைத்து பாடல்களும் சூப்பர் ஹிட் என்றாலும் இந்த பாடலில் இளையராஜா செய்திருக்கும் ஜாலம் தனித்துவம் வாய்ந்தது போல் தோன்றும் (எனக்கு).

இந்த பாடல் ஆரம்பத்தில் அவர் இசையை தொடங்கும் போதே நம்மை கை பிடித்து பனி விழுந்து கிடக்கும் இரவுக்கு அழைத்து சென்று விடுவார்

கூடவே லா...லா...லா... என்று பெண்களின் கோரஸ் நம்மை வரவேற்பது போல் தோன்றும் இனிமை. அதை தொடர்ந்து S.P.பாலசுப்ரமணியம் ,S. ஜானகி குரல்களில் அதே வசீகரம் நம்மை மயிலிறகாய் வருடும் அதிசயம்.

பல்லவி முடிந்தவுடன் வரும் இசை நாம் ஒரு அடர்ந்த மூங்கில் காட்டுக்குள் இருப்பதாய் தோன்றும் ஒரு பிரமை அடடடா ......... இந்த பாடலும் கூட ஒரே வீட்டுக்குள் இருந்தாலும் பிரிந்து வாழும் கணவன் மனைவி இணைந்து வாழ ஆசைபடும் போது வார்த்தைகளையும் சந்தர்ப்பங்களையும் தேடும் போது தாஜ்மஹால் பின்னணியில் வரும் இந்த பாடல் காட்சியில் அவர்கள் இணைய உதவி செய்வதாய் அமையும் இந்த பாடல் பிரிந்திருக்கும் தம்பதிகளுக்கு ஒரு தேவாமிர்தம் என்று சொல்லலாம்.

இளையராஜா என்ற இந்த இசை சக்கரவர்த்தியின் இசை ஜாலங்கள் தான்

நம் மனதை எப்படியெல்லாம் வசீகரித்திருக்கின்றன .

வீடியோ லிங்க் முகவரி

http://www.youtube.com/watch?v=25T3nmhlMQM

இந்த பாடலின் படம் மௌனராகம்

நாயகன் நாயகி மோகன் ரேவதி

இந்த பாடல் எழுதியது வாலி

பாடல் பாடியவர்கள் S.P.பாலசுப்ரமணியம் ,S. ஜானகி

இயக்கம் மணிரத்னம்

படம் வெளியான ஆண்டு 1986

ஆர்.வி.சரவணன்

ஆயிரம் ஆண்டு அதிசயம்

ஆயிரம் ஆண்டு அதிசயம்

ஆயிரமாவது ஆண்டை

கொண்டாடும்

தரணிபோற்ற

உயர்ந்து நிற்கும்

தமிழரின் பெருமையே

மாமன்னன் ராஜராஜ சோழன்

திருப்பணியில்

உருவான

அற்புதமே

உன்னை

பெருமையுடன் வணங்குகின்றோம்

********************************************************************

தஞ்சை பெரிய கோயில் சில குறிப்புகள்

06-01-2010 ஆனந்த விகடன் இதழிலிருந்து

1004 ம் வருடம் துவங்கி 1010 ம் வருடம் கட்டி முடிக்கப்பட்டது

யுனெஸ்கோ உலக மரபு சின்னமாய் இதனை அங்கீகரித்தது

கோயில் உருவாக்கத்திற்கு நிதி யை கொட்டி கொடுத்தவர்கள் முதல் ஒரே ஒரு செப்பு காசு கொடுத்தவர் வரை அனைவர் பெயரையும் என் பெயருக்கு கொடுக்கப்படும் அதே முக்கியத்துவத்துடன் கல்வெட்டில் பொரிக்க ஆணையிட்டார் ராஜராஜன்

கோயிலின் உள்ளே இருக்கும் லிங்கத்தின் பீடம் 3அடி உயரமும் அடி55 சுற்றளவும் கொண்டது. ஒரே கல்லில் செதுக்கப்பட்ட இந்த பீடத்தை செய்வதற்கு குறைந்த பட்சம் 500 டன் எடையுள்ள பாறை மலையில் இருந்து வெட்டி நகர்த்தி கொண்டு வந்திருக்க வேண்டும்

நன்றி ஆனந்த விகடன்

ஆர்.வி.சரவணன்

சில நொடி சிநேகம்

சில நொடி சிநேகம்

அரியலூர் ரயில் நிலையத்திலிருந்து வெளி வந்த சரண் கூட்டத்தின் இடையே மிதந்து சென்று அரியலூர் பேருந்து நிலையம் செல்லஆட்டோ பிடித்தான்.

நான்கைந்து பேருடன் ஆட்டோவில் அமர கஷ்டமாக இருந்தாலும் வேறு வழி

இல்லாமல் அட்ஜஸ்ட் செய்து அமர்ந்தான் .

ஆட்டோ கிளம்பியவுடன் அருகில் அமர்ந்திருந்தவர்

" தஞ்சாவூர் செல்ல வேண்டும் பஸ் நிறைய இருக்குமா "என்று கேட்டார்.

சரண் "நிறைய இருக்குங்க "என்றான்.

உடனே "தஞ்சாவூர் போய் டிபன் சாப்பிட ஹோட்டல்

திறந்திருக்குமா" என்றும் கேட்டார்.

"திறந்திருக்கும் "என்றான்.

ஆட்டோ பஸ் ஸ்டான்ட் வந்தவுடன் சரண் இறங்கினான் கூடவே அவரும் இறங்கினார் .

"தஞ்சாவூர் போகும் பஸ் எங்கே நிற்கும்" என்று கேட்டார்.

சரண் "நானும் தஞ்சாவூர் தான் போறேன் வாங்க" என்று அழைத்து கொண்டு பஸ் நிற்கும் இடத்தை நோக்கி விரைந்தான்.

அங்கே புறப்பட இருந்த இரண்டு பேருந்துகளும் கூட்டத்தால் நிரம்பி வழியவே சரண்" இதுலே ஏற முடியாது. அடுத்த பேருந்து உடனே வரும் அதுலே போகலாம்" என்றான்.

அவரும் சரி என்றவர் அடுத்த பேருந்துக்கு இருக்கும் கூட்டம் பார்த்து

" நாம வாசலுக்கு போயிடலாம் பஸ் உள்ளே வரும் போது உடனே ஏறிடலாம்" என்றார்.

அவர் சொல்வது சரியென படவே சரண் "சரி வாங்க" என்று அவருடன் சென்றான்.

அங்கு போய் காத்திருக்கையில்அவர்தான்சென்னையிலிருந்து

திருமணத்திற்க்காக வந்திருப்பதாகதெரிவித்தார்.

சரண்" நானும் தான் "என்று சொன்னான்.

அவர் "ஒரு டீ சாப்பிடலாம் வரீங்களா" என்றார்.

அவனுக்கும் சாப்பிடலாம் போலிருந்தாலும்நம்மால் அவருக்கு ஏன் செலவு என்று கருதி வேண்டாம் என்று மறுத்தான்.

"நீங்க போய் சாப்பிட்டு வாங்க" என்றான்.அவர் சென்றார்.

அப்பொழுது தஞ்சாவூர் செல்லும் பஸ் நிற்கும் இடத்தில ஒரு பேருந்து நிற்பது

தெரிய வர சரண் உடனே சென்று நின்ற கண்டக்டரிடம் கேட்டான்.

அவர் ஆமாம் திருச்சி போக வேண்டியது தஞ்சாவூர் போக போகுது ஏறிக்கங்க என்றார்

அவன் உடனே சென்று ஏறி இடம் பிடித்து அமர்ந்து, கூட வந்தவருக்கும் ஒரு இடம் போட்டு வைத்து கொண்டு பேருந்தின் ஜன்னல் வழியே அங்குமிங்கும் அவர் வருகிறாரா என்று பார்த்துகொண்டு அவருக்காக காத்திருந்தான்.

டீ சாப்பிட்டு விட்டு வந்த அவர் கூட வந்தவனை காணுமே என்று தேடியவர் கண்ணில் ஒரு தஞ்சாவூர் செல்லும் பேருந்து வர வேகமாய் சென்று பேருந்தில் ஏறி அமர்ந்து அவனுக்கும் சேர்த்து இடம் போட்டு வைத்து கொண்டு அவனுக்காக காத்திருந்தார்.

ஆர்.வி.சரவணன்

மாலை சூடும் வேளை ....

மனம் கவர்ந்த பாடல்கள் 2

மாலை சூடும் வேளை அந்தி மாலை தோறும் லீலை .........

இந்த பாடல் இடம் பெற்ற படம் நான் மகான் அல்ல

இந்த படத்தில் இடம் பெற்ற மாலை சூடும் வேளை அந்தி மாலை தோறும் லீலை .........

இந்த பாடல் ஆரம்பத்தில் ஜானகி ஆ.....ஆ....ஆ..... என்று ராகம் இசைக்க தொடர்ந்து வரும் இசை நம்மை கொண்டு செல்லும் இடம் ஒரு பகல் நேரத்து மதிய வேளையில் ஒரு கிராமிய ஆற்றங்கரையோரம்அந்த பாடல் முடிந்த பின்னும் அதே இடத்தில் இருந்து வர மனம் மறுக்கும்

இந்த பாடலில் உன்னிப்பாய் கவனிக்க வேண்டிய ஒரு விஷயம் என்னவென்றால் இந்த பாடல் ஆரம்பிக்கும் போது டு...டு...ட்டு...டு... என்று உடுக்கை ஒலி போல் கேட்க ஆரம்பிக்கும் அது பல்லவி முடிந்து அதை தொடர்ந்து வரும் இசையிலும் சரணத்திற்கு பின் வரும் பல்லவியிலும் இது வரும் பல்லவி வரும் இடத்தில் மட்டும் இந்த உடுக்கை ஒலி வரும் எத்தனையோ முறை நான் இந்த பாடலை கேட்டிருந்தாலும் சமீபத்தில் இந்த பாடலை கேட்ட போது இந்த ஒலியை கவனித்தேன் நீங்களும் கவனியுங்கள் பாடல் முடிந்த பின்னும் இந்த ஒலி நம்முள் கேட்டுகொண்டே இருக்கும்

இந்த பாடலில் வரும் வரிகளில் கோடையில் நான் ஓடை தானே வாடையில் நான் போர்வை தானே .......... எனக்கு பிடித்த வரிகள்

எப்பொழுது கேட்டாலும் நம்மை அமைதியின் சிகரத்திற்கு அழைத்து செல்லும் இந்த ராக தேவன் இளையராஜா வின் இசை வார்ப்பை என்னவென்று சொல்ல ....

நாயகன் நாயகி சூப்பர் ஸ்டார் ரஜினி ராதா

இந்த பாடல் எழுதியது வைரமுத்து

பாடல் பாடியவர்கள் S.P.பாலசுப்ரமணியம் ,S. ஜானகி

தயாரிப்பு கவிதாலயா (கே.பாலச்சந்தர்)

இயக்கம் S.P.முத்துராமன் படம் வெளியான ஆண்டு 1984

ஆர்.வி.சரவணன்

ஒரு சுவாரஸ்யம்

அனைத்து

வலை பதிவுலக

நண்பர்களுக்கும்

விநாயகர் சதுர்த்தி

நல்

வாழ்த்துக்கள்

என் நண்பர் T.N. ஸ்ரீதர் அனுப்பிய மின்னஞ்சல் சுவாரஸ்யம் ஒன்று

உலகின் அரசன் நீ

மிகவும் அபாயகரமானவன் நீ

மற்றவரையும் உலகத்தையும் ஆள்பவன் நீ

பிறரை நேசிப்பவன் நீ

வீட்டுக்கு சென்றால் மனைவிக்கும் மனைவியோ நீ

ஆர்.வி. சரவணன்

அனைத்து பதிவுலக நண்பர்களுக்கு ரம்ஜான் தின நல் வாழ்த்துக்கள்

சூப்பர் ஸ்டார் ஆர்ட்

சூப்பர் ஸ்டார் ஆர்ட்

என் மகன் ஹர்ஷவர்தன் வரைந்த சில ஓவியங்களை எனது தளத்தில் ஏற்கனவே வெளியிட்டிருக்கிறேன் அதற்க்கு முன்பு (சென்ற வருடம்) அவன் ஆனந்த விகடன் அட்டைபடத்தில் இருந்த சூப்பர் ஸ்டார் ரஜினி யை பென்சில் ஓவியமாக வரைந்திருந்தான்.

நான் அதை என் வழி தளத்திற்கு அனுப்பினேன் என்வழி வினோ பாராட்டி அதை தளத்தில் வெளியிட்டார். பதிவுலக நண்பர்களும் ரஜினி ரசிகர்களும் உற்சாகத்துடன் பாராட்டினர். அதை என் தளத்தில் வெளியிடலாம் என்று அந்த ஓவியத்தையும் ஆனந்தவிகடன் அட்டைப்படத்தையும் இதோ வெளியிட்டுள்ளேன்

என்வழியில் வெளியான இந்த இடுகையை சென்று பார்க்க, கமெண்ட் படிக்க விருப்பமுள்ளவர்கள் இந்த முகவரியில் சென்று படிக்கவும்

http://www.envazhi.com/?p=13499

S. ஹர்ஷவர்தன்

இதை வெளியிட்டு ஊக்கபடுத்திய என்வழி வினோ அவர்களுக்கும்

பாராட்டிய அனைத்து இதயங்களுக்கும் எனது நன்றி

ஆர்.வி.சரவணன்

இன்க்ரீமென்ட்

இன்க்ரீமென்ட்

"சார் சார் கொஞ்சம் பார்த்து போடுங்க சார் விலைவாசி ஏறிடுச்சி"

"நோ நோ இதுக்கு மேல கண்டிப்பாக முடியாது "

கெஞ்சுவது கிளார்க் சேகர்

மிஞ்சுவது ஜெனரல் மேனேஜர் பரத்

அன்று அலுவலகத்தில் இன்க்ரீமென்ட் பேசி கொண்டிருந்தார்கள் . எல்லா ஊழியர்களும் எப்படியாவது நாம் நினைக்கும் இன்க்ரீமென்ட் வாங்கி விட வேண்டுமென்று மிகுந்த ஆர்வமாய் இருந்தனர் . மேனேஜர் முதலாளி சொல்லியிருப்பது போல் இழுத்து பிடித்து இன்க்ரீமென்ட் போடவேண்டும் என்பதில் உறுதியாக இருந்தார்.

சேகரும் விடாபிடியாய் 500 இன்னும் கூட வாங்கி விட வேண்டும் என்று போராடினான். முடியாமல் ஏமாற்றமாய் வெளி வந்தான்.

மேனேஜர் M.D அறைக்குள் நுழைந்தார். சொன்னதை நிறைவேற்றிய திருப்தியுடன் .

"சார் நீங்க சொன்னது போல் பேசி முடிச்சிட்டேன் எல்லாருக்கும். சேகர் தான் கொஞ்சம் முரண்டு பிடிச்சார் "என்றார்.

"சில பேருக்கு எவ்வளவு கொடுத்தாலும் பத்தாதுன்னு தான் சொல்வாங்க நீங்க அதை கண்டுக்காதீங்க" என்று மேனேஜர் கொடுத்த பேப்பர் வாங்கி பார்த்தவர்

"குட் குட் சரியான மேனேஜர் தான் எனக்கு வந்துள்ளீர்கள்" என்று பாராட்டினார்

இப்போது பரத்திற்கு இன்க்ரீமென்ட் எழுதி கொடுத்தார்.

அதை பார்த்த மேனேஜர் அதிர்ச்சியாய், " சார் இதை நான் எதிர்பார்க்கலே

எனக்கு ஒரு 2000 ஆவது கூட போட்டு கொடுங்க ப்ளீஸ் "என்றார்.

"நீங்களும் அவங்களை போல் கேட்காதீங்க பரத்"

சார் சார் கொஞ்சம் பார்த்து போடுங்க சார் விலைவாசி ஏறிடுச்சி

நோ நோ இதுக்கு மேல கண்டிப்பாக முடியாது

இப்போது

கெஞ்சுவது மேனேஜர்

மிஞ்சுவது M.D

ஆர்.வி.சரவணன்

அன்பே......

அன்பே......

அன்பே நீ எனை கடந்து சென்ற பின்னும்

உன் நினைவுகள் மட்டும் எனை சுற்றி சுற்றி பின்னும்

---------------

அன்பே நீ மண்ணில் பதித்து சென்ற காலடி சுவடு கூட எனை கவிதைக்கு தூண்டுகிறது

---------------

அன்பே

உன் காதல் பார்வை எனை அள்ளி

உன் அருகில் வைக்கிறது

உன் வெட்கமோ எனை தள்ளி

எதிரில் வைக்கிறது

------------------

அன்பே

உன் வார்த்தைகளுக்கு நான் செவி கொடுக்கவில்லை

உண்மை தான்

ஆனால் உன் உதடுகளின் அசைவுக்கு

என் உயிரையே

அல்லவா கொடுத்து விட்டேன்

படம் நன்றி கூகுள்

ஆர்.வி.சரவணன்

இப்படி ஒருவர் இப்படியும் ஒருவர்

இப்படி ஒருவர் இப்படியும் ஒருவர்

சமீபத்தில் நான் எனது மனைவி மகன் மகள் உடன் வேளச்சேரியில் உள்ள உறவினர் வீடு செல்வதற்காக அம்பத்தூர் எஸ்டேட் பேருந்து நிலையம் சென்றோம்.

அங்கே பேருந்து நிலையத்தில் வேளச்சேரி செல்ல இரண்டு பேருந்து நின்று கொண்டிருந்தது எது முதலில் செல்லும் என்று தெரியாததால் அங்கே நின்று கொண்டிருந்தவரிடம் கேட்டேன். அவர் தெரியலைங்க நானும் தெரியாமல் தான் நிற்கிறேன் என்றார். நாங்கள் சரி என்று கூட்டம் குறைவாக இருந்த பேருந்தில் ஏறி அமர்ந்தோம்

சில நிமிடங்களில் அடுத்த பேருந்து கிளம்ப ஆயத்தமானது இறங்கி சென்று ஏறி விடலாமா என்று யோசித்து எழுந்தோம் அப்போது நான் விசாரித்த அந்த நபர் ஓடி வந்து அந்த பேருந்து கிண்டி வரைக்கும் தான் செல்கிறதாம் நீங்கள் இறங்காதீர்கள் என்று சொல்லி விட்டு கிளம்பிய பேருந்தில் சென்று ஏறி கொண்டார். அந்த நபரை (மன்னிக்கவும்) மனிதரை நினைக்கும் போது சந்தோசம் அடைந்தேன்.

உலகில் இப்படி ஒருவர்

உறவினர் வீட்டுக்கு சென்று விட்டு அன்று மாலையே வேளச்சேரி பேருந்து நிலையம் வந்தோம். அம்பத்தூர் எஸ்டேட் செல்ல வேண்டிய பேருந்து வர வர கூட்டம் உடனே திபு திபு வென்று ஏறி அமர்ந்தது. எங்களால் ஏற முடியாமல் இரண்டு பேருந்தை விட்டு விட்டோம். மூன்றாம் பேருந்து வரும் போதே நான் மட்டும் சென்று ஏறி பெண்கள் இருக்கையில் என் மனைவிக்கும் மகளுக்கும் கைக்குட்டை போட்டு இடம் பிடித்து எனக்கும் மகனுக்கும் ஆண்கள் பக்கம் இடம் போட்டேன் .

கூட்டத்தில் ஏற முடியாமல் எல்லோரும் ஏறியவுடன் தான் என் குடும்பத்தினர் ஏறினர். அதற்குள் பெண்கள் பக்கத்தில் நான் போட்டு வைத்த இடத்தில் ஒரு பெண்மணி அமர்ந்து விட்டார்.

"என்னங்க நான் சீட் போட்டு வச்சிருக்கேன்" என்றேன்

" எல்லோரும் இது போல் சீட் போட்டா நாங்க எப்படி அமர்வது" என்றார்.

" நான் நீங்கள் முன்னாடியே வந்து சீட் போட வேண்டியது தானே நான் எவ்வளவு கஷ்டப்பட்டு ஏறி சீட் போட்டேன் தெரியுமா" என்றேன்.

" எல்லாரும் கஷ்டப்பட்டு தான் ஏறி வரோம் "என்று கூறிய படி கைக்குட்டை யை எடுத்து என்னிடம் கொடுத்துவிட்டார்.

நான்" நீங்க உட்காரதுக்கு நான் சீட் போட்டு வைக்கணுமா" என்று கோபப்பட்டேன்.

"இன்னொரு சீட் இருக்கு உட்கார சொல்லுங்க" என்றார்.

"அப்படினா ஏன் கைக்குட்டை யை எடுத்து கொடுத்தீங்க" என்று நான் அவரிடம் கேட்டதற்கு அவரிடம் இருந்து எந்த பதிலும் இல்லை .

பின் என் மனைவி ,மகன், மகள், மூவரும் ஆண்கள் பக்கம் நான் போட்ட இருக்கையில் அமர்ந்து வந்தனர். நான் நின்று கொண்டே பயணித்தேன் பயண நேரம் ஒரு மணி நேரம்.

அந்த பெண்மணி எனக்கு முடியலைங்க நான் உட்கார்ந்துக்கிறேன் என்று சொல்லியிருந்தால் நான் சரி என்று ஒப்பு கொண்டிருப்பேன் ஆனால் அவர்கள் இப்படி நடந்து கொண்டது என்னை வருத்தமடைய வைத்தது

உலகில் இப்படியும் ஒருவர்

படம் நன்றி கூகுள்

ஆர்.வி.சரவணன்

படித்ததில் பிடித்தது

படித்ததில் பிடித்தது

எனது நண்பர் அனுப்பிய ஒரு SMS மெசேஜ்

மலரே

உன் மீது

இருக்கும்

நீர் துளிகள்

பனித்துளிகள்

என்று

நினைத்து விடாதே

நீ

வாடாமல்

இருப்பதற்காக

நான்

சிந்திய

கண்ணீர் துளிகள்

தான்

அவை

இப்படிக்கு மேகம்

எனக்கு நண்பர் அனுப்பிய மின்னஞ்சலில் எனை கவர்ந்த சில வரிகள்

பொது வினியோகத்தில் விற்கப்படும் அரிசியின் விலை கிலோ ஒரு ரூபாய். ஆனால் பொதுக்கழிப்பறையின் கட்டணம் மூன்று ரூபாய்.

வங்கிகளில் வாகனக் கடன்களுக்கான வட்டி ஐந்து சதவிகிதம். ஆனால் கல்விக்கடனுக்கான வட்டி 12 சதவிகிதம்.

ஒரு கிரிகெட் குழுவையே கோடிக்கணக்கான பணத்தைக் கொடுத்து விலைக்கு வாங்கக்கூடிய செல்வந்தர்கள் இருக்கிறார்கள். அதே பணத்தில் பத்தில் ஒரு பங்கைக்கூட நாட்டு நலப் பணிகளுக்குச் செலவு செய்யக்கூடிய செல்வந்தர்கள் மட்டும் இல்லை!

நாம் அணியும் , ஆடைகளும், காலணிகளும் குளிரூட்டப்பட்ட கடைகளில் விற்கப்படுகின்றன. ஆனால் நாம் உண்ணும் காய்கறிகளும் , பழங்களும் நடைபாதைக் கடைகளில் விற்கப்படுகின்றன

இது என்ன தேசமோ

ஆர்.வி.சரவணன்

பதிவுலகில் நான் எப்படிபட்டவன்

பதிவுலகில் நான் எப்படிபட்டவன்

என்னை அருமை நண்பர் எப்பூடி தொடர் பதிவு எழுத அழைத்திருந்தார் அவருக்கு என் நன்றி இதோ பதிவுலகில் நான் எப்படிபட்டவன் என்ற தொடர் பதிவு

1) வலைப்பதிவில் தோன்றும் உங்கள் பெயர்?

ஆர்.வி. சரவணன்

(கோயில்லே ஆயிரம் பேருக்கு சாப்பாடு எல்லாம் போட்டு வச்ச பெயரல்ல இது )

2) அந்தப் பெயர் தான் உங்கள் உண்மையான பெயரா? இல்லை எனில் பதிவில் தோன்றும் பெயரை வைக்க காரணம் என்ன?

ஆம் அது தான் என் உண்மையான பெயர்

(ஆம் )

3) நீங்கள் தமிழ் வலைப்பதிவு உலகில் காலடி எடுத்துவைத்ததைப் பற்றி....

(இது ஒன்னும் சரித்திர நிகழ்வு கிடையாது )

செய்திகள் படிப்பதற்காக ஒவ்வொரு தளமாக நான் சென்று படிக்க படிக்க எனக்கு வலைபதிவு உலகம் சுவாரஸ்யமானது .பின் என்வழி வலைத்தளத்தில் நான் தொடர்ச்சியாக படித்து பின்னூட்டம் இட்டேன் எனது கவிதை, கட்டுரை, என் பையன் வரைந்த ரஜினி படம் என்று என் வழியில் வெளி வந்தது. கிரி , எப்பூடி தளங்களும் எனக்கு பரிச்சயமாகின .நாமும் ஒரு வலை தளம் தொடங்கி பார்ப்போம் என்று எனது குடந்தையூர் தளத்தை தொடங்கினேன்.

4) உங்கள் வலைப்பதிவை பிரபலமடையச் செய்ய என்ன என்னென்னவெல்லாம் செய்தீர்கள்?

ஒன்னுமே செய்யலை. பதிவுலக நண்பர்களின் தளங்களுக்கு சென்று பதிவுகளை படித்து பின்னூட்டம் இட்டேன். அதன் மூலம் என் தளம் ஏதோ கொஞ்சம் பிரபலமானது

(சன் டிவி முதல் எல்லா பத்திரிக்கைகளிலும் விளம்பரம் கொடுக்க நினைச்சாலும் அதெல்லாம் முடியுமா )

5) வலைப்பதிவின் மூலம் உங்கள் சொந்த விஷயத்தை பகிர்ந்து கொண்டதுண்டா? ஆம் என்றால் ஏன்?அதன் விளைவு என்ன? இல்லை என்றால் ஏன்?

ஆம். ஆனால் தொடர்ச்சியாக எல்லாம் இல்லை . சொந்த விசயங்களை அவ்வப்போது பகிர்ந்து கொண்டிருக்கிறேன் என்னை பொறுத்தவரை கஷ்டங்களை பகிர்வதன் மூலம் துக்கம் பாதியாக குறைகிறது. சந்தோசங்களை பகிர்வதன் மூலம் சந்தோஷம் இரட்டிப்பாகிறது.

(பார்த்து வாழ்க்கை வரலாறு எதுனா எழுதிட போறே)

6) நீங்கள் பொழுதுபோக்குக்காக பதிவுகளை எழுதுகிறீர்களா அல்லது பதிவுகளின் மூலம் சம்பாதிப்பதற்காகவா?

சம்பாதிப்பதற்கு எல்லாம் எழுதவில்லை. இதில் எழுதுவதின் மூலம் எனக்கு மன நிறைவு கிடைக்கிறது. மற்ற பதிவர்களின் பதிவுகள் படிப்பதும் சுவாரஸ்யமாக உள்ளது. நல்ல ஒரு பொழுதுபோக்கு தான்

(பதிவுகள் மூலம் வருமானம் வந்தால் வேணாம்னா சொல்லிட போறே )

7) நீங்கள் மொத்தம் எத்தனை வலைப்பதிவுகளுக்கு சொந்தக்காரர்? அதில் எத்தனை தமிழ் வலைப்பதிவுகள் உள்ளன?

குடந்தையூர் என்ற ஒரே ஒரு வலை பதிவு மட்டுமே

(ஒரு வேலையை ஒழுங்காக செய்தால் போதும் இன்னொன்னு னா பூமி தாங்குமா )

8) மற்ற பதிவர்கள் மீது எப்போதாவது உங்களுக்கு கோபம் அல்லது பொறாமை ஏற்பட்டது உண்டா? ஆம் என்றால் யார் அந்த பதிவர்? ஏன்

இல்லை யார் மேலும் நான் பொறாமை பட்டது இல்லை கோபப்பட்டதும் இல்லை மற்ற பதிவர்கள் போல் சிறப்பாக எழுத வேண்டும் என்று பொறுமையுடன் மட்டுமே இருக்கிறேன்

( பொறாமையா அப்படினு ஒரு வார்த்தை இருக்கான்னு கேட்பே போலிருக்கு)

9) உங்கள் பதிவை பற்றி முதன் முதலில் உங்களை தொடர்புகொண்டு பாராட்டிய மனிதர் யார்? அவரைப் பற்றி, அந்த பாராட்டைப் பற்றி..

நான் வலை பதிவு உலகில் நட்சத்திரமாய் மின்ன ஆசைபடுவதாக குறிப்பிட்டிருந்தேன். என்வழி வினோ நட்சத்திரமாக என்ன சூரியனாகவே பிரகாசிக்கலாம் நீங்கள் என்று வாழ்த்தினார். நண்பர்கள் கிரி ,எப்பூடி நல்ல இடுகைகளை உங்களிடமிருந்து எதிர்பார்க்கிறோம் என்று ஆரம்பத்திலேயே கண்டிப்புடன வாழ்த்தி உர்சாகபடுதினர் மற்ற பதிவுலக நண்பர்களும் தொடர்ந்து என்னை ஊக்கபடுத்தி வருகின்றனர். இல்லாவிட்டால் கண்டிப்பாக என்னால் ஐம்பது பதிவுகள் எழுதியிருக்க முடியாது.

(உலகமே ஊக்கப்படுத்தினால் தான் வாழ முடியும்னு சொல்வே போலிருக்கு )

10) கடைசியாக----விருப்பம் இருந்தால் உங்களைப் பற்றி பதிவுலகத்துக்கு தெரிய வேண்டிய அனைத்தையும் பற்றி கூறுங்கள்..

ஒரு தனியார் நிறுவனத்தில் பணியாற்றும் ஊழியன் நான்

திரை உலகம் சென்று டைரக்டர் ஆக வேண்டும் என்பது என் விருப்பம் முடியவில்லை. ஒரு ஜர்னலிஸ்ட் ஆக வேண்டும் என்பதும் என் விருப்பம்

முடியவில்லை. பதிவுலகின் மூலம் எனது விருப்பம் நிறைவேறியது போல் ஒரு மன நிறைவு கிடைத்திருக்கிறது . என் எழுத்துக்கள் யாரையும் புண்படுத்த கூடாது என்பதில் மிகுந்த கவனமுடன் எழுதுகிறேன்

(வாழும் மட்டும் நன்மைக்காக வாழ்ந்து பாப்போம்)

என்னை ஊக்கப்படுத்தும் அனைவருக்கும் நன்றிகள் பல பல

ஆர்.வி. சரவணன்

கோயில் நகரம் கும்பகோணம்

கோயில் நகரம் கும்பகோணம்

இந்த இடுகையில் கும்பகோணம் பற்றிய தல வரலாறு கொஞ்சம் சொல்லலாம் என்றிருக்கிறேன் . உங்களில் நிறைய பேருக்கு தெரிந்திருக்கும் .இருந்தாலும் குடந்தையூர் என்று தளம் வைத்து கொண்டு அதை பற்றி சொல்லாவிட்டால் எப்படி அதனால் தான். ஹி ....ஹி.... இதனுடன் நான் 2004 மகாமகத்தின் போது எடுத்த சில படங்களையும் அதனுடன் சில ஆலயங்களையும் தந்துள்ளேன் .

ஒரு முறை ஊழிப் பெரு வெள்ளத்தால் உலகம் அழியும் நிலை வந்த போது தேவர்கள் சிவனிடம் சென்று வேண்ட, சிவன் ஒரு கும்பத்தில் அமுதத்தை நிரப்பி பூஜை செய்யும் படி ஆணையிட்டார். அதன் படியே கும்பத்திற்கு பூஜைகள் நடைபெற ஊழி பெருவெள்ளம் வந்து கும்பத்தை அடித்து சென்றது. அதை ஒரு குன்றின் மேல் கொண்டு சேர்த்தது. தேவர்கள் சிவபெருமானை வேண்டினர். பூமிக்கு வந்த சிவபெருமான் கும்பத்தை அம்பெய்து உடைத்தார். கும்பம் உடைந்து அமுதம் பூமியில் பரவியது. அமுதம் வழிந்த இடம் தான் மகாமக குளம். கும்பம் வந்து சேர்ந்த இடம் குடமூக்கு என்று பெயராயிற்று.( கும்பம் என்பது குடம் கோணம் என்பது மூக்கு ) காலப்போக்கில் குடந்தை என்று வழங்கப்பட்டு கும்பகோணம் என்று பெயராயிற்று.

உச்சி பிள்ளையார் கோவில்

ராமசாமி கோயில்

ராமசாமி கோயில் உற்சவர்

சாரங்க பாணி கோயில்

சாரங்க பாணி கோயில் உள்ளே கோபுரம் ஒன்று

மகாமக குளத்தில் இருபது கிணறுகள் உள்ளன குரு பகவான் சிம்ம ராசியில் இருக்கும் போது மாசி மாதத்து பௌர்ணமியும் மக நட்சத்திரமும் கூடும் நாள் மகாமக நாள் .

இந்த படங்களில் இருக்கும் பக்தர்களில் நானும் ஒருவன்

ஹி ....ஹி....

ஆர்.வி.சரவணன்

நமது இந்தியா

நமது இந்தியா

31 மாநிலங்கள்

எண்ணற்ற

மொழிகள்

சாதிகள்

மதங்கள்

29 முக்கிய பண்டிகைகள்

கொண்ட

ஒரு

தேசம்

நம்

இந்தியா

நாம் இந்தியர் என்பதில் என்றும் பெருமை அடைவோம்

அனைவருக்கும் எனது இனிய சுதந்திர தின நல் வாழ்த்துக்கள்

படம் நன்றி கூகுள்

ஆர்.வி.சரவணன்

இருமன அழைப்பிதழ் 3

இருமன அழைப்பிதழ் 3

சரண் ஆகிய என் மனதுக்குள் இனித்தது எது நான் உமாவை இன்று திருமணம் செய்ய போகிறோம் என்பதை நினைத்த போது என்னடா இவன் குழப்பறான் என்று நினைப்பீங்களே பொறுமை

நான் உமாவின் முறை பையன் அதாவது மாமா பையன் துரத்து சொந்தம் நெருங்கிய சொந்தமாகி விட தான் பிரயத்தன பட்டு கொண்டிருக்கிறேன் .உமாவின் மேல் காதல் கீதல் என்றெல்லாம் கதை விட நான் தயாரில்லை ஏனெனில் நான் ஒரு பிரக்டிகல் மனிதன் எனக்கு உமாவை பிடித்திருக்கிறது. அவளது அழகு படிப்பு புத்திசாலித்தனம் பணம் இவையல்லாம் சேர்ந்து என்னை கட்டி போட்டிருக்கிறது இப்படிப்பட்ட பெண் மனைவியானால் என் வாழ்க்கை சிறப்பாக இருக்கும் எனவே அவள் மேல் ஆசை கொண்டேன்.
என் ஆசை தெரிந்து என் பெற்றோர் உமாவின் அப்பாவிடம் சம்பந்தம் பேசினார்கள் ஆனால் அவர் மறுத்து விட்டார். மாப்பிள்ளை வெளி நாட்டில் இருக்க வேண்டுமாம் . சாதாரண வேளையில் இருக்கும் நான் வெளிநாட்டை வரைபடத்தில் தான் பார்க்க முடியும் நான் எங்கே வெளிநாடு செல்வது

சரி உமாவின் மனதில் இடம் பிடிக்கலாம் என்று நினைத்தேன் . என் பார்வை, சிரிப்பு, தோற்றம், பேச்சு எதையும் அவள் லட்சியம் செய்யவில்லை என் கனவில் மட்டுமே என்னை லட்சியம் செய்தாள். நொந்து போன நேரத்தில் கார்த்திக்கும் உமாவும் பழகியது வேறு எனக்கு அதிர்ச்சியை உண்டு பண்ணியது. கார்த்திக்கிடம் அவர்கள் உறவை பற்றி உரசி பார்த்தேன். உண்மையான நண்பர்களாம். சொல்லி பெருமைபட்டான். அவனை விட நான் பெருமைப்பட்டேன்.

கார்த்திக் வேலைக்காக சென்னை செல்ல என் சந்தோஷம் கரை புரண்டு ஓடியது. உமாவிடம் என் விருப்பத்தை சொன்னேன். அவள் கிண்டலாய் ஒரு சிரிப்பு சிரித்து விட்டு வேறு வேலை இருந்தால் பார். என்று சொல்லி விட்டாள். அவளை தவிர வேறு வேலை இருப்பதாக எனக்கு தோன்றவில்லை.

ஆனால் உமாவுக்கு கல்யாண வேளை வந்தது. திருமணம் நிச்சயமானது. ஹீரோவாகலாம் என்று ஆசைபட்ட நான் வில்லனாக வேண்டியதாகி விட்டது. திருமணத்தை எப்பதியாவது நிறுத்தும் எண்ணத்துடன் இதோ கல்யாணத்திற்கு வந்திருக்கிறேன். நான் மாப்பிள்ளை குடும்பத்தில் நான் ஏவியிருக்கும் ஏவுகணை எப்போது தன் வேலையை ஆரம்பிக்கும் என்று ஆவலோடு காத்து கொண்டிருந்தேன்.

யாரோ ஒருவர் ஓடி வந்து உமாவின் அப்பாவை அழைத்து கொண்டு மாப்பிளையின் ரூம் செல்ல சில வினாடிகளில் உமாவின் அப்பா கோபமாய் வெளி வந்தார். கூடவே மாப்பிளையின் குடும்பம்.

"என்னங்க என்னாச்சு "

"என்னாச்சா எவனோ ராஸ்கல் நாம் பொண்ணுக்கு போட்டிருக்கும் நகையெல்லாம் போலி நாம் சரியிலாத குடும்பம் என்று மொட்டை கடிதாசி எழுதியிருக்கான். அதை படிச்சிட்டு இவங்களும் உண்மையானு கேட்கறாங்க" "சந்தேகம் என்று வரும் போது தெளிவுபடுதிக்கிறது நல்லது தானே" "இதுலேயே தெரியுதே எங்க மேல உங்களுக்கு நம்பிக்கையில்லன்னு மனுஷனுக்கு நம்பிக்கை அவசியம் சார்"

" அதுக்காக நாங்க ஏமாற முடியாது.

"நாங்க யாரையும் ஏமாத்தலை எங்க குடும்பம் கெளரவமானது "

"அப்புறம் ஏன் இப்படி லெட்டர் வருது "

ஆகா என்னோட ஏவுகணை இலக்கை தொட்டுருச்சி

உமாவின் அண்ணன் "உங்க பையனை பத்தி கூட தான் எங்களுக்கு அரசல் புரசலா நியூஸ் வந்துச்சி நாங்க எதுனா கேட்டோமா நல்ல குடும்பங்கள் ஒன்னு சேரும் போது இப்படி எதுனா நியூஸ் வரது சகஜம் தான். இதை போய் பெரிய விசயமா சொல்றீங்க"

" பொய்யெல்லாம் சொல்லாதே என் பையன் சொக்க தங்கம் "

"அதே தான் நாங்களும் சொல்றோம் எங்க நகையும் சொக்க தங்கம் தான். வேணும்னா எங்க நகையை நாங்க செக் பண்ணி நீருபிக்க முடியும் உங்க பையன் நல்லவன் ன்னு எப்படி நீருபிக்க போறீங்க" என்றதும்

மாப்பிள்ளையின் அப்பா கோபா வேசமாய் இந்த கல்யாணம் நடக்காது வாங்க நாம போகலாம் என்று கிளம்ப ஆரம்பிக்க மாப்பிள்ளை உமாவின் அண்ணனிடம் பாய முற்பட இவன் ஓட கார்த்திக் தடுத்தான்.

எனது அப்பா அம்மா இருவரும் சமாதான முயற்சியில் இறங்க அவர்கள் செயல் நியாயமாயினும் எனக்கு அது கஷ்டமாச்சே என்று அவர்கள் மேல் எரிச்சல் பட்டேன்.

உமாவின் அப்பா "போகட்டும் விடுங்க "என்று சலிப்புடன் சொல்ல நான் களிப்புடன் சந்தோசத்தின் உச்சிக்கு சென்றேன்.

பொண்ணு மேடை வரைக்கும் வந்தாச்சு என்ன பண்ண போறீங்க ஒருவர் சொன்னார்.

இத சொல்றதுக்குன்னே யாராவது ஒருத்தர் கல்யாணத்திற்கு வருவாங்களோ "உங்க சொந்தத்திலேயே தான் பையன் இருக்கானே அவனை முடிச்சிடுங்களேன் "இப்படி ஒருவர் சொன்னார்.
ஆகா அவர் வாய்க்கு சர்க்கரை மூட்டையை தான் கவிழ்க்கணும் அவர் வாழ்க
நான் நினைத்தது நிறைவேறுகிறது
இப்போது உமாவின் அண்ணன் "அப்பா நம்ம கார்த்திக்கையே உமாவுக்கு கல்யாணம் பண்ணி வைக்கலாம் உமாவின் மனசறிஞ்சு நடந்துக்குவான் உமாவையும் நல்ல படியா வச்சு காப்பாத்துவான்"
என்றவுடன் உமாவின் அப்பா யோசனையாய் தன் மனைவியை பார்த்தார்.
" ஆமாங்க கைல வெண்ணையை வச்சுக்கிட்டு நெய்க்கு அலைஞ்ச மாதிரி நாம ஏன் கஷ்டபடனும் உமாவுக்கு கார்த்திக் தான் சரியானா ஜோடி இதை நாம முன்னாடியே பண்ணிருக்கணும் "
என்று சொல்லவும்
ஏவுகணை எனக்குள் பேரிடியாய் இறங்கியது.
உமாவின் அப்பா என்ன சொல்கிறாய் என்று உமாவை பார்க்க, அவள் கார்த்திக்கை பார்த்து நாணத்துடன் தலை குனிய கார்த்திக் உற்சாகத்துடன் தன் பெற்றோரை பார்க்க அவர்களும் தலையசைக்க உமாவின் அண்ணன் கார்த்திக் கை பிடித்து மேடைக்கு அழைத்து சென்றான்.
மேளம் முழங்கியது
என் கண்கள் கலங்கியது
கார்த்திக் உமாவின் கழுத்தில் தாலியை கட்டினான்.
நான் மண்டப வாசலை நோக்கி நடையை கட்டினேன்.

முற்றும்

ஆர்.வி.சரவணன்